பதினேழு மாதங்கள் எதிர்கட்சியாக இருந்த பின்னர் பெஞ்சமின் நெதன்யாகு வியத்தகு ஒரு மறுவருகையை நிகழ்த்தியிருக்கிறார். அவரது லிக்குட் கட்சியும் வலதுசாரி-மதக் கூட்டணியினரும் சேர்ந்து செவ்வாய் கிழமையன்று நடந்த நாடாளுமன்ற தேர்தல்களில் உறுதியான முன்னிலையைப் பெற்றிருக்கிறார்கள். 93 சதவிகித வாக்குகள் எண்ணப்பட்ட நிலையில், தீவிரவாத மத சியோனிசம், அதிதீவிர ஷாஸ், ஐக்கிய தோரா யூதம் ஆகியோரை உள்ளடக்கிய அவரது கூட்டணி 65 இடங்களை பிடிக்கும் நிலையில் இருக்கிறது. 120-உறுப்பினர்களைக் கொண்ட க்னெசெட்டில் (இஸ்ரேல் மாமன்றம்) இது வசதியான பெரும்பான்மை எண்ணிக்கை. லிக்குட் கட்சி கூட்டணி 32 இடங்களைப் பிடித்து மிகப்பெரிய கட்சியாக உருவெடுத்திருக்கிறது. கடந்த ஆண்டு நெதன்யாகு எதிர்ப்புக் கூட்டணியை உருவாக்கிய பிரதமர் யாகீர் லபிட் தலைமையிலான மத்திய வலது யெஷ் அட்டித் 24 இடங்களை வெல்லும் என்று கணிக்கப்பட்டிருக்கிறது. கடந்த ஆண்டு, திரு.லபிட் மற்றும் பிற எதிர்கட்சி தலைவர்கள் இணைந்து வலதுசாரி, மத்திய, மத்திய-இடது மற்றும் அரபுக் கட்சிகளை உள்ளடக்கிய ஒரு குறுக்கு-சித்தாந்த கூட்டணியை உருவாக்கிய பிறகு, இஸ்ரேலில் மிக நீண்டகாலம் பிரதமர் பதவியில் இருந்த திரு.நெதன்யாகு பதவியிலிருந்து நீக்கப்பட்டார். ஆனால் யாமினா கட்சியின் நஃப்தாலி பென்னட் தலைமையிலான கூட்டணி அரசு உடைந்த பிறகு, 2019ல் துவங்கி ஐந்து தேர்தல்களை நாடு சந்திக்க வேண்டியிருந்தது. மூன்று ஊழல் குற்றசாட்டுகளில் விசாரணையை எதிர்கொண்டிருக்கும் திரு.நெதன்யாகுவைப் பொறுத்தவரையில் எதிர்கட்சியில் இருந்த காலம் அவரது வலது-மதவாத அடித்தளங்களை மீண்டும் கட்டமைப்பதற்கான ஒரு வாய்ப்பைக் கொடுத்தது. “வலிமையற்ற” கூட்டணியை தாக்கியதோடு, இஸ்ரேலை “மீண்டும் வலுவானதாக” மாற்ற அவர் உறுதியளித்தார். அவரது பரப்புரை எடுப்பட்டிருக்கிறது என்பதையே முடிவுகள் காட்டுகின்றன.
க்னெசெட்டில் ஒரு உறுதியான பெரும்பான்மை இருக்கும் நிலையில், திரு.நெதன்யாகு ஒரு நிலையான அரசை அமைக்கக் கூடும். எதிர்கட்சிகளின் அழுத்தம் தரும் உத்திகளை தவிர்க்க சட்டமும் இயற்றக் கூடும். ஆனால் அவரது மறுவருகை இஸ்ரேலின் சமூக நிலைத்தன்மைப் பற்றியும் பிராந்திய அமைதி பற்றியும் கேள்விகளை எழுப்பலாம். அவரது விசுவாசிகளுக்கு அவர் “இஸ்ரேலின் மன்னர்”. ஆனால் உண்மையில் அவர் பிளவுப்படுத்தும் ஒரு தலைவர்தான். பாலஸ்தீனப் பிரச்னைக்கு ஒரு நியாயமான தீர்வு குறித்த அவரது அர்ப்பணிப்பு சந்தேகத்திற்குரியதே. தனது கண்காணிப்பின் கீழ் ஒரு சுதந்திரமான பாலஸ்தீனம் உருவாகாது என்று அவர் ஒரு முறை சொன்னார். ஈரான் மீதான அவரது கடுமையான கொள்கைகளும் வெளிப்படையானவை. தனது எல்லைக்குள் கவிழ்க்கும் தாக்குதல்களில் ஈடுபடுவதாக அந்நாடு இஸ்ரேல் மீது குற்றம் சாட்டியிருக்கிறது (அதை இஸ்ரேல் மறுக்கவும் இல்லை). திரு.நெதன்யாகு ஒரு கடும்போக்காளர் என்றாலும் அவரது முக்கிய கூட்டணித் தலைவரான மத சியோனிசத்தின் இடாமர் பென்-கிர் இன்னும் தீவிர வலதுசாரி தலைவர். 2007ல் இனவெறியை தூண்டியதற்காகவும் பயங்கரவாதக் குழுவை ஆதரித்ததற்காகவும் தண்டிக்கப்பட்ட திரு. பென்-கிர், ஆக்ரமிக்கப்பட்ட பகுதிகளில் தற்காலிக அரசாக இயங்கும் பாலிஸ்தீன அதிகாரத்தை கலைக்க வேண்டும் என்று விரும்புகிறார். பாலஸ்தீன அரசு அமைவதை கடுமையாக எதிர்த்தும் வந்திருக்கிறார். இஸ்ரேலில் உள்ள அரேபிய குடிமக்கள் மீதும் அவரது தாக்குதல்கள் நிகழ்ந்திருக்கின்றன. திரு.நெதன்யாகு மற்றும் திரு.பென்-கிர் ஆகியோரின் அரசு இஸ்ரேலின் வலதுசாரி சக்திகளுக்கு ஒரு பெரும் பாய்ச்சலாக இருக்கலாம். ஆனால் நாட்டின் நீண்டகால நலன்களில் ஆர்வம் கொண்ட எந்தவொரு தலைவரும் ஆக்ரமிக்கப்பட்ட பகுதிகளில் அதிகரித்து வரும் வன்முறையையும் இஸ்ரேலுக்குள் அதிகரித்து வரும் சமூக அமைதியின்மையையும் புறக்கணித்துவிட முடியாது.
This editorial has been translated from English, which can be read here.